Reconstitution de la libération au Muy en Provence : Femme à vélo en robe, gants et béret devant une voiture ancienne
Retour sur un Tour de France 2017 démarré par l’exclusion du Slovaque Sagan…
Sagan, Campion dau Monde eslovac, fa lo bèu, lo play-boy, quora si ten sus sei doas cambas mai es un destruci quora rodèla sus lei doas rodas de sa bicicleta. Per anar ganhar una corsa si serve de sei braç e de seis espalas contra seis adversaris per si faire plaça.
Aquo duvié arrivar. A 200 metras de la linha a Vittel (Vosges) a mandat d’un cop de coide, contra lei cledas metalicas, lo Britanic Cavendish que pecaire aguet una clavicula rompuda. Cavendich a degut abandonar lo Tour de France e Sagan n’es estat escobat, forabandit . Après aguer agachat lo ralentit de l’auvari mi sieu dich qu’aquèla punicien era detz cops meritada. Mai lei cataus de son equipa e de seis esponsors an fach de grands sagans, un bèu bosin, en disènt qu’aquo era una injustici. Li fa en elei una grossa perda de sous. S’esperavon veire Sagan e son Maillot Vert sus lei Champs Elysées.
Ata, lo Tour de França a perdut una grossa part de son interès dempuei que totei lei ciclistas an una aurilheta que li permete d’ausir leis ordres de son director d’equipa mau nomenat « sportif », tot dau tèmps de l’estapa. Lo contarole de la corsa es ansin totau. Aquo fa que lei maluros correires partits davant, après aguer pedalat 200 qms coma de calucs en escapada, si fan ramassar a quauquei centenaus de metras de « l’Arrivée », en vesènt passar coma una cisampa lei locomotivas dau peloton. Graci a l’aurilheta leis equipas d’esprinters podon dosar seis esforç tot bèu just coma conven. Grossa frustacien dei teleespectators que jorn après jorn dins leis estapas de planura veson lo meme scenario estofa -garris. Regreti lo tèmps deis escapadas que permetién au ganhaire d’estre rendut sus la linha 20 minutas avans un peloton sampalhat en pichons grops.
Urosament nos resta leis estapas de montanha ente leis aurilhetas fan pas sa lei. Falié seguir l’Espanhou Bahamontès, lo Luxemborgés Gaul, l’Italian Pantani, lo Provençau Virenque sus lei pendis de l’Izoard… e gaire n’eron capables ! Un jorn qu’eri anat saludar meis amics de Chastelmanh vegueri au pus aut de la Vau Grana lo bèu monument de Pantani, mort pecaire encara joine dins una cambra d’una modesta ostalarié. Convendrié de parlar dau dopagi dins lo ciclisme. Va farai un autre cop. La plaça mi fa fauta, aquèu sujet ne’n merita.
Andrieu Abbe